4. Sinfoniski koncert

Élisabeth Jacquet de La Guerre
Céphale et Procris - Ouvertüre

Ulrich Pogoda
Segmente
prapremjera serbskorěčneje wersije

Wolfgang Amadeus Mozart
Sinfonie Nr. 27 - KV 199 in G-Dur

Henryk Mikołaj Górecki
Małe Requiem dla pewnej polki - op. 66


Z twórbomaj dweju njewšědneju dźěsćow, kotrejž stej w časowym wotstawku lětstotka skutkowałoj, zahaji so 4. sinfoniski koncert tuteje hrajneje doby. Jedna so při tym wo Sinfoniju čo. 27 G-dur KV 199 (prapremjera 1773), kotraž słuša k zažnym, tak mjenowanym „Salzburgskim sinfonijam“ Wolfganga Amadeusa Mozarta a wo uwertiru k „Céphale et Procris“ (prapremjera 1694 w Pariskim dźiwadle) z pjera Élisabeth-Claude Jacquet de La Guerre. Je to scyła prěnja opera, kotruž bě hdy žona skomponowała. Francoska barokna komponistka zahra hižo z dźewjeć lětami před Ludwigom XIV. na cembalu a zahori z tym krala tak jara, zo wón wysoko talentowanu holcu při kralowskim dworje přiwza, ju čas žiwjenja financielnje podpěrowaše a jeje twórby předstajić da. Tak tež tragédie-lyrique „Céphale et Procris“, kotraž bu w pózdnich 1980-tych lětach znowa wotkryta a z toho časa tójšto předstajenjow a CD-nahrawanjow dožiwi. Hłownej twórbje napjateho koncertneho wječora pak stej z pjera Ulricha Pogody „Wosom segmentow za rěčnika a orchester“ - po wujimkach z romana „Stary nan“ wot Jurja Brězana (rěčnik: Torsten Schlosser) a „Małe requiem dla pewnej polki“ op. 66 (Mały rekwiem za polku) Henryka Mikołaja Góreckeho. Kompozicija Ulricha Pogody zaklinči w serbskej wersiji prapremjernje. Scyła stej to dwě jara wosobinskej, so wuznawacej twórbje serbskeho a pólskeho komponista, kotrejž stej dokoławokoło wróćicy noweho lěttysaca nastałoj.