KULTURNA ZAHRODA

Sabrina Häckel – sopran
Katrin Enkemeier – alt 
Stefan Intemann – tenor 
Jonas Enseleit – bariton 
Martin Lorenz – bass

sobotu, 7. junija 2025, 19:30 hodź. 

w ramiku Budyskich komornych koncertow

połna płaćizna 13,00 € / potuńšena płaćizna 10,00 €

Quintense słušeja mjeztym hižo šěsć lět k „mjezynarodnje wjele lubjacym newcomeram w žanru pop a cappella”.  Wot spočatka swojeho hudźbneho tworjenja, kotrež bě so zahajiło na Hudźbnej wysokej šuli w Lipsku, wěnuje so ansambl interpretaciji jendźelskorěčneje, ryzy wokalneje pop-, jazz- a soulhudźby. Rukopis wuměłcow je njezaměnliwy – nic naposledk swójskich aranžementow dla, zwjetša z pjera basoweho spěwarja Martina Lorenza. Z tak mjenowanymi groovami, vocal licks, tighter beatbox, ćopłymi basslines, jadriwym backing-spěwanjom kaž tež putacymi solo-hłosami přenjesu woni swoju zahoritosć za hudźbu na wšitkich dokoławokoło.

sobotu, 14. junija 2025, 19:30 hodź.

w ramiku dołheje nocy kultury

Orchester Serbskeho ludoweho ansambla wobdźěli so na lětušej Dołhej nocy kultury z wosebitym koncertom. We wobłuku Kulturneje zahrody SLA zahraja hudźbnicy ansambla znate a mjenje znate, cyle wěsće pak originelne šlagry salonoweje hudźby. Lóštny koncertny wječork je tuž zaručeny.
 

sobotu, 21. junija 2025, 19:30 hodź.

w ramiku Fête de la Musique

Darmotny zastup!

Jewišćo za (serbski) dorost

Z tójšto blachom we wačokach zahudźi serbska brassband Šwintuchi a spožči křidła starym ludowym melodijam Serbow. Druhdy podadźa so młodźi mužojo při tym tež na krótki wulět do popoweje hudźby – cyle po hesle: „Wšitko, štož nam wjeselo a dobru naladu wobradźa.“

Radwor je tež BRASS. Ansambl dujerjow na blachowych instrumentach RadworBrass je so dlěje hač 30 lět w Radworskej wotnožce Budyskeje wokrjesneje hudźbneje šule etablěrował. Dźěći a młodostni wuknu ze zahoritosću swoje dujerske instrumenty wobknježić a hraja zhromadnje serbske ludowe spěwy, renesansne reje abo tež spirituale. Na te wašnje woni wjele zarjadowanjow hudźbneje šule a wosady wobohaćeja.

Juliane Liebing – spěwanje, gitara, husle
Albrecht Schumann – klawěr

sobotu, 28. junija 2025, 19:30 hodź.

Jarése je akustiska hudźba, kotraž wutroby hrěje. W měšeńcy z popa, soula a ducha bluesa, zwjazanej ze spodobnymi melodijemi, šarmantnym hłosom a hłuboko sahacymi tekstami, je dwójka Jarése bjezčasna a moderna. W aktualnym albumje „Eleonore“ nadeńdźemy zwuki zahorjaceje popoweje hudźby, kotruž spěwarka, gitaristka a huslerka Juliane Liebing a pianist Albrecht Schumann (trojka) harmonisce zjednoćenaj poskićujetaj.

Lena Hauptmann – spěwanje
Dan Baron – gitara

sobotu, 5. julija 2025, 19:30 hodź.

Łužiska spěwarka a komponistka Lena Hauptmann zwjazuje jazzowe groovy z filigranej popowej melodiku do přewšo žiwych pěsnjow z wosobinskim charakterom. Wona pohibuje so multilingualnje mjez serbskej, jendźelskej a brazilsko-portugiziskej rěču z wliwami swingoweho jazza, brazilskich rytmow, popa, jazza a šansona.
Gitarist Dan Baron ju kongenialnje přewodźa. Z nim doby wona jako Duo LeDazzo hižo mjezynarodne myta.  W nowembrje 2024 je Duo LeDazzo Serbow wuspěšnje na wubědźowanju „Liet International“ na kupje Korsice, štož je takrjec ESC narodnych mjeńšin, ze swójskej kompoziciju „Co by nadejšła“/ „Što bych namakała“ zastupowało.
 

sobotu, 12. julija 2025, 19:30 hodź.

Hrajemy žiwu a hnujacu hudźbu, wšako smy stajnje tež sami jako pytacy po puću. Tuž čujemy so ze wšěm na tutym swěće zwjazani, čemuž je tole tohorunja přisudźene abo so tak zda …
Wosebje zasakli smy w kombinaciji groova z luboznej muzikalnosću gypsy swinga, při čimž naša hudźba (podobnje napojej „Krambambuli“) ze wšelakich dalšich hudźbnych přidawkow wobsteji a ze wšeho, štož je za nas “žiwa hudźba”.
Začućapołne zynki hač do groova w stilu „swing-manouche“ wabja ke kedźbliwemu słuchanju, k spodobanju abo tež k rejowanju!

sobotu, 19. julija 2025, 19:30 hodź.

Matthias Hübner – pohraničny cellist, komponist a wospjetny dobyćer wubědźowanja „Indie international songwriting contest“ – twori ze swojim solowym programom na cellu, e-cellu, na loopstation a efektowych nastrojach měšeńcu swětoweje hudźby, folka, klezmera a meditatiwneho rocka.
Wuměłc nadźěła sej w běhu lět swójsku zynkowu rěč, kotraž so na ludowej a rockowej hudźbje orientuje a wuprudźa klasiski, koncertantny etos.
Wosebitostka jeho hudźby je specielne zasadźenje cella. Při tym njeda jemu hudźbnik jeno spěwać, ale tež płakać, rjejić a korčeć.

sobotu, 26. julija 2025, 19:30 hodź.
 

Paul so takle wopisuje: „Cyle prjedy, jako w Berlinje hišće tajka dźiwna betonowa murja steješe, narodźi so w Budyšinje dźěćo, kiž smědźeše hižo zahe hudźbnopedagogiske wudobyća Němskeje demokratiskeje republiki wužiwać a kotrež chcyše, měješe, dyrbješe na huslach hrać. Na nich hudźach w 90tych lětach w kapałach ze žortnymi mjenami, kaž Köterkacke. Po tym zo so wone rozpušćichu, započach z luteje wostudy sam hudźić a jězdźach wot 2003 zwjetša po němskorěčnym rumje, hrajach pak tež hižo raz w Tel Avivje, Ramallah abo New Yorku. Spočatnje bě to punk bjez bijadła, gitary a basa, unplugged z huslemi a spěwanjom. Pozdźišo přidružichu so folkowe a reggeajowe čisła a dwě duwje – Berlinska dróha a Atze Wellblech – kaž tež Lesebühne Kopfstand.“

Micha Winkler – pozawna
Matthias Macht – bijadło
Tomas Kreibich-Nawka – pišćele

sobotu, 2. awgusta 2025, 19:30 hodź.

Nowe wašnje družiny trija – wobstejaceho z třoch ptačkow Drježdźanskeje hudźbneje sceny. Micha Winkler, Matthias Macht a Tomas Kreibich-Nawka su minjene lěta poměrnje wuspěšnje zdokonjeli, so wuměłsce po móžnosći wobkružić. 2012 dóńdźe potom k hudźbnemu „supergauwej“. Wot tohole transcendentneho podawka sem celebrěruje trio nětko prawidłownje wysokoenergetisku syntezu z funka, hiphopa, noweje a volxoweje abo ludoweje hudźby, rock’n’ rolla a samo jazza.

sobotu, 9. awgusta 2025, 19:30 hodź.

Spěwarka Milena Wowčerjec přeprošuje wutrobnje na pisany popowy wječor.
Ze swojim čućiwym a intensiwnym wašnjom, němske a jendźelske covery kaž tež samospisane a -komponowane serbske balady přednjesć, twori wona hnujacu atmosferu, kotraž publikum bjezposrědnje docpěje.

sobotu, 16. awgusta 2025, 19:30 hodź. 

Kuzinje Hanka Wowčerjowa a Weronika Kalinučcyna hižo někotre lěta hromadźe hudźitej a zhromadnje swójbne swjedźenje, kwasy abo druhe zarjadowanja hudźbnje wobrubjatej. Z wobšěrnym repertoirom serbskich a mjezynarodnych spěwow zamóžetej publikum z jedno- abo dwuhłósnymi interpretacijemi z klawěrnym přewodom zahorić. 

Susanne Moewes – spěwanje
Peter Moewes – piano, spěwanje
Sebastian Lebelt – gitara, spěwanje

sobotu, 23. awgusta 2025, 19:30 hodź.