WITAJĆE DO 73. HRAJNEJE DOBY SLA

Lubi wopytowarjo, lubi přećeljo ansambla,

w hrajnej dobje 2025/2026 wěnujemy so načasnym temam kaž róli žony abo poměrej čłowjeka k přirodźe a wobswětej. Předewšěm chcemy bohatu mnohotnosć serbskeje kultury dale wotkrywać.

Prezentujemy Wam na fasety bohaty program: Z produkciju Dalina swjećimy hnydom dwě premjerje na jednym wječoru. Nowe hudźbne dźiwadło grotesku Ptačk architektki serbskeje awtorki Róže Domašcyneje ze spěwohru Die Fischerin komponistki Emilie Mayer wuměłsce zwjazuje. To je twórba, kotraž dodni towaršnostne konwencije a rólowe wobrazy. We wobłuku našich sinfoniskich koncertow stajamy kruchi serbskich komponistow z klasiskim a romantiskim repertoirom kaž tež z načasnymi twórbami do inspirěrowaceho dialoga.

Našemu młodemu publikumej powědamy stawiznički wo přećelstwje a sebjewědomju: Kak so małemu pampuchej po jeho dołhim pućowanju zeńdźe? Zaspi rapak kwas ze sroku? A kotre kuzłapołne dyrdomdeje dožiwjeja Abrafaxy w Čornym młynje?

Zhromadnje z Wami wjeselimy so na pozbudźace hudźbne dźiwadło, njezapomnite galawječory, wulkotne koncerty a lubosćiwje inscenowane dźěćace bajki. Z orchestrom, baletom a chórom kročimy po klasiskich a modernych, eksperimentalnych a folkloristiskich šćežkach. Wotkryjće sej z nami serbsku kulturu w jeje cyłej hudźbnej a rěčnej mnohotnosći. Budźće dźěl tutych wosebitych dožiwjenjow. Chcemy Was inspirować, jimać a překwapić. Wjeselimy so, zo směmy z Wami zhromadnje nowe horiconty wotewrěć.

Witajće k nam!