Wokomiki słónca

Hudźbno-literarny wječor spomina z wěncom słowow, hudźby, wobrazow a filmow na bohate literarne tworjenje serbskeho spisowaćela Bena Budarja (1946-2023). Jako awtor za dźěći a dorosćenych spisa wón basnje, powědančka, dźiwadłowe kruchi, bajki a spěwne teksty. Wuběr serbskich a zdźěla tež němskich basnjow a pěsnjow zmóžnja dohlad do jeho mnohostronskeho tworjenja. Fota a wideja, w kotrychž awtor sam ze swójskich knihow čita, pokazuja awtentiski wid na serbskeho literata.

Dale wěnuje so program zhromadnemu dźěłu z hudźbnikom a komponistom Měrćinom Weclichom, kiž zahudźi medley ze zhromadnych spěwow. Nimo toho zaklinča twórby Jurja Winarja, interpretowane wot smyčkoweho kwarteta Serbskeho ludoweho ansambla. Teksty čitataj wnučk Bena Budarja Filip Budar kaž tež dźiwadźelnica Majka Kowarjec.

Beno Budarjowe němskorěčne powědančko „So bin ich die Letzte” (1981) bě literarna předłoha za krótkofilm DEFA pod titulom „Unruhe | Wopyt” z lěta 1984 pod režiju Tonija Bruka, kotryž so na tutym wječoru tohorunja pokaza. W nim powěda staruška młodemu wopytowarjej wo tym, zo so serbska rěč, tradicije a zhromadnosć zhubja, štož Budar w swojich twórbach stajnje zaso wobjednawa. Wón je so čas žiwjenja za serbsku maćeršćinu a domiznu kaž tež za naležnosće Serbow zasadźował. W zrudźacej rozprawje žony w filmje spóznawaš pak zdobom škričku wjesołosće, štož je charakteristiske za Bena Budarja. Přetož w jeho poeziji chowa so přeco tež tróšku radosće.

Ludowe nakładnistwo Domowina wozjewi k tutej składnosći wobdźěłany a sylnje rozšěrjeny nowy nakład zběrki „Dźens sym połsta dubow sadźił“ (2011). Wuhotowanje inkl. wobalki je nowe.