Zymski čas

Scenisko-koncertantny adwentny koncert z orchestrom a chórom

Z koncertnym programom Zymski čas přeprošujetej orchester a chór na hudźbny zazběh do hodowneho časa.
Prěni dźěl programa je koncertantny: Znate a mjenje znate serbske hodowne spěwy zaklinča w rjanych aranžementach. Hudźba powěda wo wočakowanju, pokojnosći a wosebitej atmosferje adwentneho časa we Łužicy.
W druhim dźělu steja serbske nałožki kołowokoło hodowneho časa w srjedźišću. Hudźbno-scenisce předstajeja so tradicije, kotrež su hač do dźensnišeho wažny dźěl kulturneho herbstwa Serbow. Su to mjez druhim „Přaza”, městnosć zhromadneho powědanja, spěwanja a dźěłanja w ćmowym počasu, kaž tež „Dźěćetko” w Slepjanskej kónčinje, jedne z najznaćišich serbskich hodownych postawow.