Sinfonijowy koncert

Richard Wagner
Siegfried-Idyll w e-dur WWV 103

Jan Bělk
Stigma integrum concerto

Korla Awgust Kocor
Kantilene čo. 3

Carolina Eyck
4. sada Metsa Happa (Skakaca rěka) z Fantasias za theremin a smyčkarjow

Antonín Dvořák
Lěsny měr op. 68 čo. 5

Franc Schreker
Komorna symfonija

Swět zwukow połny pohiba a atmosfery
W rozmołwje z thereministku a komponistku Carolinu Eyck

Metsa Happa rěka titul 4. sadźby Wašeje kompozicije z 6 dźělemi Fantasias za theremin a smyčkowy kwartet resp. smyčkowy orchester. Što je Was k tutej kompoziciji inspirěrowało a kotre zwukowe wobrazy so publikumej skića?
Při mojim kompoziciskim procesu steji husto najprjedy hudźba w srjedźišću. Z toho wuwiwaja so wobrazy z přirody: wuchodźowanje po lěsu, rěka ze skakacymi rybami, wóń lěća a swětło mjez štomami. Metsa Happa (přełožene: » Skakaca rěka «) wuwiwa zwukowy swět połny pohiba a atmosfery, w kotrymž so dožiwjenja přirody a nimale bajkojta nalada zwjazuja.
Kruch Stigma integrum concerto serbskeho komponista Jana Bělka wuznamjenja so přez ekspresiwne a lyriske pasaže w smyčkarjow. Kotru rólu hraje theremin?
Theremin njezetka smyčkarjow jako cuzy elektroniski efekt, ale jako melodiski instrument z cyle swójskej wurazliwosću. Přez swoje suwace přechody a spěwny zwuk zarjaduje so na wosebite wašnje do smyčkowych harmonijow. Tak nastawaja zwukowe barby, kotrež zdobomznate skutkuja a přiwšěm něšto nowe a překwapjace w sebi noša.
Z kantilene čo. 3 Korle Awgusta Kocora zaklinči dalša twórba serbskeho komponista. Što je te wosebite za Was tutu twórbu na thereminje hrać?
Hudźba Korle Awgusta Kocorowej je za mnje hłuboko emocionalna z jeho melodijemi a harmonijemi. Ćopły zwuk theremina spožča melodiskim linijam w g-moll wosebitu intensitu a čini wuraznosć serbskeje hudźby bjezposrědnje čujomnu. Přez to nastanje za mnje sylny zwisk k serbskej kulturje.
 

Carolina Eyck je po cyłym swěće wodźaca interpretka na thereminje. 2015 bu němsko-serbska hudźbnica a komponistka z Echo klasika za koncertne nahrawanje lěta wuznamjenjena. W starobje 16 lět wuwi swójsku hrajnu techniku a wozjewi z „The Art of Playing the Theremin” prěnju wobšěrnu wučbnicu za instrument. Wona koncertowaše we wjace hač 30 krajach a hraješe mj. dr. z rozhłosowym sinfoniskim orchestrom Berlin, Brüsselskimi filharmonikarjemi a Argentine National Symphony Orchestra. 2022 wustupi pola BBC Proms a dźěše 2025 z Australian Chamber Orchestra na turneju. Carolina Eyck wozjewi wjacore solowe albumy a wěnuje so we wobłuku swojeho projekta „ Teremin & Voice” kompoziciji a produkciji filmoweje hudźby.