silwesterske a nowolětne koncerty

Na koncerty wokoło noweho lěta witaja Was hudźbnicy a rejowarjo Serbskeho ludoweho ansambla kaž tež spěwnaj solistaj ze znatymi melodijemi a wuraznymi rejemi. Twórby z klasikarjow Wienskeje Straußoweje dynastije a jich rowjenkow njesmědźa při tym pobrachować. Dale zaklinči wuběr operetow Franza Lehára. K wjerškam liča nimo toho kruchi swětoznatych musicalow kaž tež chłóšćenki serbskich komponistow.

Hudźbny nawod programa ma nawodnica orchestra SLA Katharina Dickopf. Dirigentka a na wšelakich polach skutkowaca wuměłča je so w Berlinje narodźiła a je hižo wjacore mjezynarodne orchestry dirigowała, mjez druhim Drježdźanski komorny orchester Sinfonietta Drježdźany, Mecklenburgsku statnu kapału ze Zwěrinje a Sinfoniski orchester Kairo. Spěwnaj solistaj programa staj sopranistka Yvonne Prentki a tenor Philipp Nicklaus. Choreografije su wot baletnej mišterki SLA Miy Facchinelli. Moderatorka Kristina Nerád wjedźe Was po zwučenym wašnju šarmantnje po programje.