Die letzten Dinge

Louis Spohr je jedyn z najznaćišich komponistow, dirigentow a wiolinowych wirtuozow zažneho 19. lětstotka. Z předstajenjom oratorija “Die letzten Dinge” zaklinči wuznamna twórba zažneje romantiki. Po prapremjerje krucha na ćichim pjatku, dnja 24.3.1826 w Kasselu bu komponist znaty. Předstajenje na hudźbnym swjedźenju w Düsseldorfje 1826 dowjedźe samo k tomu, zo bu swjedźeń wo jedyn dźeń podlěšeny zo bychu oratorij znowa předstajili. Tekstowa předłoha pochadźa wot Friedricha Rochlitza, kotryž zestaji teologisce najwuznamniše dźěle nowozakonskeho Janskeho zjewjenja, kotrež buchu skónčnje wot Spohra zhudźbnjene. Přez konkretne zwukowe předstajenja, měješe Rochlitz wulki wliw na twórbu. We wobrazliwym a kontrastnym orchestrowanju, wulkich chórach a nutrnych solowych pasažach rozwiwa so hudźbna wizija sudźenja, wumóženja a nadźije. Dramatiski wotmach a ćichi nyšpor wjedźe Spohrowu hudźbu k błyšćacemu finalej.