EXTREM hoch 4

Z jónkróćnje jasnej a funkcionalnej formowej rěču skićeše w lěće 1926 dotwarjeny Prellerowy dom studowacym Dessauskeho Bauhausa ateljej k bydlenju a dźěłanju –  kombinacija, kotraž tehdy nowa běše. Hakle krótko do toho běše Bauhaus dla politiskich wuwićow we Weimarje do sewjerowuchodneho małoměsta nad Łobjom přećahnył. W Dessauje wuwiwa so Bauhaus-šula pod egidu Waltera Gropiusa na ikonu architektoniskeje moderny.

Wosebje markantna je rańša fasada historiskeho ateljejoweho domu z wusahowacymi balkonami. Po architektoniskim baletom Vertikal (2022) a rejwanskej performance Mekanic (2023) wužije němsko-argentinska choreografka Celia Millán fasadu z EXTREM hoch 4 hižo třeći króć jako jewišćo. Runočasnje pokročuje rejwanska performance wjelelubjacu wuměłsku liaison z baletom Serbskeho ludoweho ansambla, kotraž je so zahajiła z elektro-tango-baletom Appiazzolla składnostnje Bauhaus-swjedźenja 2021.

Rejwanska performance wobhladuje tworjenje Dessauskeho Bauhausa jako narodźenje: wonkownje, so měnjace formy, ale tež nutřkownje – wid połny iluzijow a fantazije do přichoda. Hač su balkony snano čłonki domu? Što so stawa nutřka, hdyž so tam wotměje transformacija – je wona bolostna? Dom sta so z protagonistom: serbscy rejwarki a rejwarjo interpretuja emocije, kiž tute přeformowanje we sebi nosy. Rejowanska performance je inspirěrowana wot „reje čłonkow a iluzijow“ Oskara Schlemmersa a přenjese so pak na Bauhaus sam.

Hudźba argentinskeho komponista Rodolfa Corbetty poćahuje so na Œuvre wot Gerharta Muencha. Wona budźe twórbu w Drježdźanach narodźeneho komponista, kiž bě 1947 do Zjednoćenych Statow emigrował a wot 1960 Mexiko jako swoju domiznu wuzwolił, nowo interpretować a z načasnymi, elektroniskimi zwukami zwjazać. Serbske tradicije so jako  hudźbne elementy zapletu. Rytmiski zwuk drjewjanych šćerkotawkow skutkuje kaž procesion a přeprošuje, so fasadźe Bauhausa zbližić – nimale kaž so wospjetowacy ritual. Na tutu wašnju zesylnja so wuraz namrěwstwa Bauhausa, tak zo nastanje zaćišć, zo so Bauhaus přeměni do katedrale architektury a wuměłstwa.