Překlepana liška

interaktiwna hudźbna bajka

Serbski ludowy ansambl zahraje interaktiwnu bajku “Překlepana liška”. Stawizna wo lišce a jeje přećelow bazuje na serbskimaj bajkomaj "Wjelkowa a lišcyna wójna" a "Bity njebiteho njese" a jedna wo lišce, kiž ma tójšto dyrdomdejow zmištrować.

Liška běše lochkomyslna, a z małym žorćikom sej wjelka, mjedwjedźa a dźiwje swinjo za njepřećelow sčini. Nětko dyrbi přećiwo tutym sylnym přećiwnikam wojować. Ale liška njemóže dobyć, dokelž ma jenož staru kóčku a słabeho psa k pomocy. Tola liška njeby “překlepana” rěkała, njeby-li hižo mudry plan měła. Bjez toho, zo by woprawdźe wojowała, chce nad mócnymi přećiwnikami kaž wjelkom, mjedwjedźom a dźiwim swinjećom dobyć. Kak drje so tutón bój skónči? Z kotrymi překwapjacymi idejemi so liška wuchowa?

W tutym kuzłapołnym swěće hudźby njebudu dźěći jenož připosłucharjo, ale móža při zhromadnym spěwanju a z Orffskimi instrumentami tež sobuskutkować.