Serbskej nocy

Hdyž so w Smochćicach słónco chowa, potom zahaji so hudźbny wječor połny zwukowych barbow, stawizničkow a serbskeje žiwjenskeje radosće: Pod titulom „Serbskej nocy“ přeprošuje Serbski ludowy ansambl (SLA) na swjatočny program, w kotrymž so sinfonika, folklora, spěwanja a reje na wotměnjawe wašnje zetkawaja.

Publikum smě so na wosebje mnohostronski koncert wjeselić: Wulke orchestrowe zynki wotměnja so z ludowje inspirěrowanymi melodijemi, chórowe a solowe přinoški přidruža so rejwanskim scenam, znate zetka rědke słyšane. Twórby Korle Awgusta Kocora, Bjarnata Krawca, Jana Bulanka, Jana Rawpa, Jana Pawoła Nagela a dalšich komponistow pokazaja na bohatu serbsku hudźbnu kulturu w stajnje nowych barbach.

Hižo zazběh ze „schadźacym słóncom po serbskich ludowych melodijach“ zahaji jězbu z dobrej naladu po serbskich zwukowych swětach. Slěduja miniatury kaž na přikład „Přazne spěwy“, „Hodańčka“, „Jězba po Błótach“ kaž tež rjane spěwy z oratorijow „Wójna a měr“ a „Podlěćo“. Tež aktualne a mjenje husto hrate twórby z repertoira ansambla program wobohaćeja a přeprošuja serbsku hudźbu sobu wotkryć.

Sobuskutkowacy su orchester Serbskeho ludoweho ansambla, chór SLA, spěwne solistki a spěwni solisća, instrumentalne solistki a solisća, balet SLA kaž tež młodźinska rejwanska skupina „Rapsodija“. Předprogram wuhotuje dźěćaca rejwanska skupina Łužičanka SLA. Zhromadnje formuja protagonisća hudźbny swjedźeń, kotryž tradiciju a přitomnosć, sinfonisku zwukowu pychu a folkloristisku energiju mjez sobu zwjazuje.

„Serbskej nocy“ lubitej wječoraj połny melodijow, rejow a swjedźenskeje atmosfery – hudźbne dožiwjenje, kotrež serbsku kulturu w jeje cyłej mnohotnosći prezentuje.

Hudźbny swjedźeń Smochćicy a wjedro
Koncertaj wotměwaja so tež při špatnym wjedrje. Nastajće so prošu wotpowědnje na to (prošu žane předešćniki na městnach přihladowarjow). Dešćowe capes móža so tež pola nas kupić. Prošu přińdźće k dworej Smochčanskeho kubłanišća, hakle na městnje móže so rozsudźić, hač so wjedra dla započatk předstajenja přestorči abo hač dyrbi so koncert wotprajić.