Hudźbne nakładnistwo ENA swjeći 20-lětne wobstaće

Hudźbne nakładnistwo ENA wěnuje so zachowanju, ediciji a rozšěrjenju serbskeje hudźby. W srjedźišću steji dźěło komponista Jana Pawoła Nagela (1934–1997), jedneje z najwuznamnišich hudźbnych wosobinow serbskeje kultury 20. lětstotka. Jeho tworjenje zwjazuje tradicionelnu serbsku folkloru z modernymi kompozitoriskimi formami a twori bytostny wobstatk kulturneho herbstwa Łužicy.

Nakładnistwo bu 1991 wot awtorki Elki Nageloweje załožene, kotraž twórby swojeho muža wuda a nakładnistwo po jeho smjerći dale wjedźeše. 2006 přewza pianistka Liana Bertók, wjelelětna wuměłska přewodnica komponista, nawod. W jeje zamołwitosćiwuńdźe přez 100 dalšich edicijow, přewažnje twórby serbskich komponistow.

Nimo toho nastachu wjacore prěnjotne edicije wuznamnych komponistow z třoch lětstotkow, kiž su wědomostnje hódne, mjez druhim wot Johanna Baptista Wanhala, Giovannija Battista Viottija a Johanna Gottlieba Naumanna kaž tež łužiskich komponistow Leopolda Schefera, Jana Kiliana a Bjarnata Krawca. Sinfoniski koncert k 20-lětnemu jubilejej hudźbneho nakładnistwa ENA prezentuje wšelakorosć edicijow a wotbłyšćuje z tym wuměłsku šěrokosć nakładnistwoweho kataloga.