Romantica

Hdyž so Budyšin k „Romantica” do bajkojteho swětła nuri, wotewri tež Serbski ludowy ansambl swoje durje na wječor połny błyšćacych překwapjenkow. Wjeselće so na bajowe wiki z dudami při wohenju, bajowe postawy w domje a dworje, rejwanje w baletnym woknješku, bajowe napoje a jako wjeršk našu wulku awkciju rjanych gala-šatow.

Wot 16 hodź. | bajowe wiki w domje a dworje
Dajće sej chlěbik na kiju při wohnjowym korbje a bajkojte napoje kaž punč připołdnicy abo lutki-lunk zesłodźeć. Bajowe postawy dorostoweje skupiny Rapsodija a dudak Andreas Henčl wočakuja Was w domje a na dworje.

16 hodź. | knižna premjera: „Woodwalker. Carag so přeměnja“ na žurli
Wuspěšny rjad „Woodwalkers“ Katje Brandis zahorja dźěći po cyłej Europje – a nětko je prěni zwjazk tež w hornjoserbskej rěči wušoł. To woswjećimy z knižnej premjeru z čitanjom a hudźbu, na kotruž was wutrobnje přeprošujemy.
Carag njeje wšědny hólc: Wón je přeměnik, kiž je zdźěla jako puma w Rocky Mountains a zdźěla jako hólc w swěće ludźi žiwy. To njeje tak lochko. Hakle na Clearwater High zetka druhich přeměnikow a namaka přećelow. Tola spěšnje dyrbi wuknyć, komu móže woprawdźe dowěrić. Napjata stawizna wo přećelstwje, dyrdomdejach a pytanju za swójskim městnom mjez swětomaj.
Clemens Bobka čita z přełožka Měrany Cušcyneje, wo hudźbne wobrubjenje na akordeonje stara so Tabea Welsec. Popołdnjo za čitarki a čitarjow wot 10 lět – a wězo tež za jich staršich!

Wot 18 hodź. | rejowanje w baletnym woknje
Hdyž so baletne woknješko na jewišćo přeměni, wotuća serbske powěsće rejwansce k žiwjenju. Dožiwiće rejwarki a rejwarjow Serbskeho ludoweho ansambla přez wokno baletneje žurle a dajće so překwapić: Kotru powěsćowu figuru spóznajeće?

18:30 hodź. | Wódny muž powěda
Stawizny wo wodźe ze swojeje cyle swójskeje perspektiwy: Wódny muž wozmje Was sobu do swojeho mokreho raja a wobhladuje, inspirowany wot powědančkow serbskeho spisowaćela Jurja Brežana, Łužicu ze swojimi jězorami a rěkami. Kak woda běži, hdźe pluskota wjesele a hdźe hrozy wusaknyć? Słuchajće na stawiznički w němskej rěči a wotkryjće sej Łužicu z bajkojteho wida – dožiwjenje za wulkich a małych wopytowarjow.

19:30 hodź. | Glamour pur: Wulka awkcija gala drastow
Pod hesłom „Powěsćowe shoppowanje“ Romantica w SLA swojemu mjenu na cyle wosebite wašnje wotpowěduje! Naša šarmantna moderatorka Kristina Nerad wjedźe z wjele žortom, napjatymi stawiznami a amizantnymi překwapjenkami po wulkej awkciji gala drastow. Podpěruje ju při tym Tim Heilmann, kiž je w Budyšinje jako klankodźiwadźelnik znaty.
Něhdźe 30 do 40 gala- a jewišćowych šatow přińdźe pod hamor. Kóžda hra powěda swójsku stawiznu – wo błyšćatych jewišćowych wokomikach a wosebitych wustupach. Pohladajće hižo wot 18 hodź. w foyeru na wuběr a wotkryjće sej swój wosobinski najlubši šat, prjedy hač rěka: K prěnjemu, druhemu a třećemu!
Wokřewjenje, kultura a ideje za dary
Dajće wječor při wočerstwjacym napoju při našej barje wuklinčeć a wotkryjće sej při tiketowej kasy wosebite ideje za dar k hodam: tikety zarjadowanjow, abonementy, knižne wozjewjenja a rjane merchandise-artikle Serbskeho ludoweho ansambla.
Zastup je darmotny! Wopyt wšitkich programowych dypkow je darmotny. Přińdźće nimo a dožiwće Romanticu w SLA – bajkojtu, kulturnu a glamuroznu!