naše rejowanske pedagowgowki

Sym so 2. septembra 1977 w Drježdźanach narodźiła. Tam dožiwich swoje dźěćatstwo a młodźinski čas. Hižo zahe buch wuměłstwu a kulturje zbližena. Moja mać bě tehdy nawodnica šule a mój nan chórowy spěwar při Statnej opereće Drježdźany. Hižo jako mała holca začuwach přeće k rejowanju, tak zo přizjewichu mje mojej staršej w dźěćacym baleće Drježdźanskeje Statneje operety. Tam nawuknych z wjele wjeselom swoje prěnje baletne kročele. Husto běch při probach abo předstajenjach pódla a přeco jara horda, dźiwadłowy powětr čuchać směć. Jara žiwje so hišće na mój prěni wustup dopominam. Zahorjena a połna rozbudźenosće jón zmištrowach a najpozdźišo wot tutoho dnja bě mi jasne: budu rejwarka. W 3. lětniku wobstach wuspěšnje swoje přijimanske pruwowanje na Palucca šuli Drježdźany. 1988 zahaji so moje 8-lětne wukubłanje na jewišćowu rejwarku. Turbulentny a napinacy čas steješe přede mnu. Wjacore razy mějach sportowe zranjenja a tež přesłapjenja za čas swojeho studija zmištrować, ale tež cyle wjele dožiwjenjow, wulkotnych wokomikow a nazhonjenjow w tutym času mejach. Samo swětoznata rejwarka Gret Palucca mje hišće wuwučowa. Moje zakónčenje k diplomowej jewišćowej rejwarce wobstach 1996. Wot 1996-1997 wuwučowach Drježdźanach a zběrach prěnje nazhonjenja w rejwanskej pedagogice z dźěćimi, dorosćenymi kaž tež ludźimi z duchownymi a ćělnymi wobmjezowanjemi. 1997 započa so moja karjera jako rejwarka w Serbskim ludowym ansamblu w Budyšinje. Najprjedy jako skupinska rejwarka, pozdźišo jako skupinska a solowa rejwarka. Mnohe turneje do tu- a wukraja smědźach dožiwić. Wot 2012 -2023 absolwowach přidatnu kwalifikaciju w Berlinje ze zakónčacym certifikatom „Fachowa kompetenca zažna pedagogika reja“ (Fachkompetenz Frühpädagogik Tanz). Hižo za čas swojeho aktiwneho časa jako rejwarka započach rejwansku skupinu ŁUŽIČANKU wuwučować. Mjeztym trenuju 9 rejwanskich skupin. Mnohe dźěłarnički za dźěći kaž tež dalekubłanja pedagogow słušeja k mojim nadawkam w Hornjej a Delnjej Łužicy.

Moje mjeno je Katarina Herrmann a sym wučerka za rejowanje w dorostowym studiju Serbskeho ludoweho ansambla.
Z wulkej zahoritosću a wjeselom chcu młodym ludźom wulkotny swět reje zbližić.
W swojej dołholětnej karjerje sym nawuknyła, kak wažne je, wutworić wěstu a pozitiwnu wuknjensku wokolinu, w kotrejž móža dźěći swoju kreatiwnu stronu zwuraznić a swoje motoriske kmanosće wuwiwać.
Mam nazhonjenja we wšelakich rejowanskich stilach, mjez druhim w folklorje, baleće, modernej reji a wězo dźěćacej reji. Sym profesionelne rejowanske wukubłanje na rejwanskim konserwatoriju w Bratislavje (Słowakska) absolwowała.
W swojej karjerje jako profesionalna rejwarka skutkowach w het National Dans dźiwadle w Amsterdamje, w słowakskim profesionalnym folklornym ansamblu-SĽUK a w Serbskim ludowym ansamblu Budyšin a mějach wustupy w mnohich mjezynarodnych dźiwadłach a na festiwalach.
Mój zaměr je, wjeselo při rejowanju spěchować a runočasnje disciplinu, sebjewědomje a teamowe dźěło dźěći zesylnić.
Wjeselu so z Wašimi dźěćimi rejować a jim při tym pomhać, swoje rejwanske kmanosće wuwiwać.