Sinfoniski koncert

z twórbami Pärta, Krawca a Dvořáka

Arvo Pärt (*1935) je tučasnje jedyn z najwažnišich a runočasnje najpopularnišich tworićelow duchowneje hudźbje. We fejetonach so wón jako kuzłar zynkow a mišter spiritualnosće a archaiskich formow pomjenuje. W lěće 1976 wotkryła Arvo Pärt nowe wašnje komponowanja, kiž přewodźa jeho twórby hač do dźensnišeho. Wón mjenuje techniku “Tintinnabuli”, štož posłownje “zwónčk” woznamjenja. Pärtowa mišterka twórba “Fratres” je klasiski přikład za techniku “Tintinnabuli” a budźe we wobdźěłanej wersiji Beata Brinera w koncerće słyšeć.
 Do rjada najznaćišich a wliwapołnych serbskich komponistow słuša bjezdwěla Bjarnat Krawc (1861-1946). Z tym, zo zaměstni Krawc serbske elementy do swojich twórbow, spyta wón wědomje swój lud duchownje skrućić. W jeho “Serbskej rapsodije za husle a klawěr” op. 36 so jeho koncepcija zwjazanosće z ludom wěrnje wotbłyšćuje. Orchestrowa forma krucha wot Helmuta Fryčy, kiž je Hans-Peter Preu na orchester SLA přiměrił, zaklinči na tutym wječoru zhromadnje z hakle 15-lětnym solowym huslerjom Leonardom Toschevom. Wón je hižo tójšto wubědźowanjow dobył. Jako nošer myta 27. wubědźowanja němskeho hudźbneho fondsa hraje Leonard Toschev wot februara 2019 wiolinu wot Enrico Ceruti, Cremona 1845.
Jako dalša wurjadna twórba zaklinči serenada za smyčkowy orchester w e-dur op. 22  Antonína Dvořáka (1841-1904), znata jako suma dobreho zynka a najrjeńšich čěskich melodijow. Wšitko při tutej twórbje dopomni na dobru naladu młodeho komponista Dvořáka. Mnoho temow je do pjeć sadźboweho krucha zasadźił. Smyčkarjo wuprudźa při tym ćopłotu a wutrobitosć, kiž samo podobne twórby Tschaikowskeho abo Griega njepřetrjechja.
Pod hudźbnym nawodom intendantki SLA, Judith Kubicec, interpretuje orchester SLA chłóšćenki komorneje hudźby, zhromadnje z dorostowym wiolinistom Leonardom Toschevom.

WOBSADKA orchester Serbskeho ludoweho ansambla, Leonard Toschev (wiolina)

HUDŹBNY NAWOD N.N.

 

Keine weiteren Aufführungen in dieser Spielzeit.