Nalětne čuće

Chórowy koncert

Nalětne čuće” (ně.: Frühlingsahnung) je titul jedneho ze “šěsć spěwow, zanjesenych pod hołym njebjom” op. 48 Felixa Mendelssohna Bartholdya, kiž předstaji chór Serbskeho ludoweho ansambla w swojim nowym nalětnim koncerće składnostnje 175. posmjertnin komponisty, kapałneho mištra a załožerja Lipšćanskeho konserwatorija. Zdobom spomina so w programje tež hižo na 200. narodniny załožerja serbskeje wuměłskeje hudźby, na  Korlu Awgusta Kocora.  Z jeho pjera zaklinča tři eksemplariske chórowe sadźby za muskich, mjez druhim „Lubka lilija“. W lěće 1822 w Zahorju rodźenemu wučerjej, kantorej, organistej a komponistej kaž tež jeho přećelej a basnikej Handrijej Zejlerjej je lětsa mnoho zarjadowanjow z wobdźělenjom Serbskeho ludoweho ansambla wěnowanych.
Naročny, ale přiwšěm zabawjacy chórowy koncert zahaji so ze štyri twórbami Jana Bulanka, mjez druhim z klasikarjemi kaž “Struga” a “Pód lugom” z Handrijom Henčlom při dudach a klarineće. Komponist běše nimale tři lětdźesatki jako hudźbny a chórowy direktor kruće ze Serbskim ludowym ansamblom zwjazany. Na jeho 20. posmjertniny dopomina so z předstajenjom jeho sylnych, serbskich chórowych sadźbow.
Ze „Čtyři písně o Marii“ Bohuslava Martinů spěwa chór wo maćeri Božej, kiž so tež jako mejska kralowna česćuje, jako znamjo za žiwjensku móc nalěća. Rjane kwětki a kćenja tutoho, na dźiwach połneho počasa symbolizuja Marju jako hnadypołnu – najrjeńša kwětka pak je wona sama.
Program chóroweho koncerta pod nawodom noweho chóroweho direktora Tvrtka Karlovića so ze spěwami Josefa Suka a Bedřicha Smetany wudospołni.



WOBSADŹENJE chór Serbskeho ludoweho ansambla

Andreas Henčl - měchawa w Es, klarineta

WUMĚŁSKI NAWOD Tvrtko Karlović

Keine weiteren Aufführungen in dieser Spielzeit.