Prjedy hač woteńdźeš

Hišće před někotrymi lětami formowachu wone  wobraz Łužicy: serbske žony w swojej narodnej drasće. Hač při dźěle, při nakupowanju abo njedźelu na kemšach, wone słušachu kaž samozrozumliwje k wšědnemu dnjej na wsach w dwurěčnej Łužicy. Hišće před 100 lětami nošeše nimale 85 % wšěch serbskich žonow wšědnje narodnu drastu. Dźensa je so tuta z wobraza wsy nimale pozhubiła. Tak je w katolskich wosadach Hornjeje Łužicy jenož hišće něhdźe dźesać žonow, kiž wšědnje w narodnej drasće chodźi. Wone su zdźěla starše hač 80 lět a zhladuja wróćo na dołhe a často dźěłapołne žiwjenje. Nimale njenapadnje, ćiše a měrnje, dožiwjamy kónc lětstotki dołheje doby w serbskich stawiznach.

Basnica Róža Domašcyna, fotograf Maćij Bulank a komponist Měrćin Weclich su so na jara dorazne wašnje z pozhubjenjom wšědneho nošenja narodneje drasty w jich knize kaž tež na DVD Ludoweho nakładnistwa Domowina pod titlom “Prjedy hač woteńdźeš” rozestajeli. Na jewišću SLA pokazaja so fota poslednich nošerkow narodneje drasty, mjeztym zo hudźba Měrćina Weclicha a dalšich serbskich komponistow přez smyčkowy orchester SLA zaklinči. Wulkotne teksty Róže Domašcyneje přednjese  Hanka Rjelcyna w serbskej abo němskej rěči.

Wot 9. oktobra hač do 3. nowembra 2023 prezentuje Matej Zieschwauck w foyeru SLA swój fotowy rjad #studijolipsk. W tutym projekće zwjazuje tradicionalnu narodnu drastu z modernu. Z tuteho maja so nowe trendy wuwić a nowe motiwacije nastać, kaž tež rozestajenje ze serbskej identitu.

Přeprošujemy Was wutrobnje sej tutu wustajeńcu wobhladać!

SOBUSKUTKOWACY smyčkowy orchester SLA
HUDŹBA Měrćin Weclich
FOTA Maćij Bulank
TEKSTY Róža Domašcyna
ČITANJE Hanka Rjelcyna