Čěske nocy

Najpozdźišo na spočatku 19. lětstotka wuwi so ze zesylnjenjom  narodneho sebjewědomja słowjanskich ludow wuska kulturna wuměna Serbow ze swojimi słowjanskimi susodami, wosebje pak z Čechami. Demonstrujo swoju přisłušnosć k słowjanstwu jako najmjeńši lud bjez swójskeho stata njepřiwzachu Serbja jenož módre-čerwjene-běłe za swoje narodne barby, ale wědomje tež lipu za swój, so wot němskeho duba wotmjezowacy symbol. Lipa, kiž wuznamjenja so z tajkimi kajkosćemi kaž mjechkosć, miłosć a měrliwosć wšak je tež wuraz za sprawnosć, lubosć, domiznu, zhromadnosć a schow. Lětuši hudźbny swjedźeń w Smochćicach wusměri so ze swojimi „Čěskimi nocami“ wědomje na bliskosć susoda a nic na eksotisku dalokosć. W srjedźišću planowaneho koncerta, kiž wotměje so znowa we wupruwowanej kooperaciji ze Smochčanskim kubłanišćom swjateho Bena, steji młoda čěska, wurjadna huslerka.  Markéta Janoušková, kotraž wobhladuje  so w prěnjej měrje jako interpretka klasiskich twórbow, je pak so jako dźowka primašowehu huslerja cymbaloweje skupiny tež stajnje intensiwnje z folkloru zaběrała. A tak nasta projektna ideja FolkloreClassic, w kotrejž so hranicy mjez tradicionelnej ludowej hudźbu a klasiku, inspirěrowanej wot folklory z wulkim hudźbnym lóštom wot nana cymbaloweje skupiny a jeho dźowki wuměrjuja.

W „Čěskich nocach“ přidruža so k tomu serbske  zynki, rozestajeja so sobuskutkowacy wjacorych formacijow hudźbnje a w dobrym susodstwje, zo bychu melodije Smetany, Janáčeka, Dvořáka, Suka, Bulanka, Nagela a dalšich zaklinčeć dali. Baletny ansambl rozšěri z klasiskimi choreografijemi, čěskimi a serbskimi folklornymi rejemi wony hudźbny wjeršk.

„Cimbálová muzika Jiřiho Janouška“, solisća, orchester, chór a balet Serbskeho ludoweho ansambla a njewšědnje wirtuozna FolkloreClassic-huslerka  Markéta Janoušková přeprošuja na jónkrótne “překročenje hranicy” mjez susodami!

Kuchar Smochčanskeho kubłanišća swjateho Bena je za tutón wječor wosebity poskitk jědźow za wopytowarjow nastajił.