Rejujmy!

„Serbska reja“ prosy do rejki

Wšudźe w Europje wuslědźiš přeco hišće folklorne drohoćinki, kotrež su so najebać konsuma a swětowych wikow wuchowali. Tež we Łužicy móžeš tójšto namakać a tak podachu so čłonojo skupiny “Serbska reja” w lěće 2014 na puć, zo bychu stare reje a zabytu hudźbu publikumej zaso zbližili. Němske pomjenowanje rejwanskeho wječorka  pochadźa z Madźarskeje a z rumunskeje kónčiny Sedmihródska (Siebenbürgen). Tam su něhdy we wjesnej korčmičce dźiwje k Csárdás hudźbje rejowali. Tehdy kaž tež dźensa njejsu předznajomosće trěbne: Learning by doing!
W zwisku z LAB F (Laboratorij za tradicionalnu Serbsku hudźbu) pokaza Wam “Serbska reja”, kak by to we Łužicy wupadać móhło.

Přinjesće prosće wjeselo a přijomne črije sobu!

čłonojo skupiny "Serbska reja":

• Gregor Kliem (Nyckelharpa, husle, spěw)
• Clemens Isensee (akordeon, spěw)
• Fabian Jacobs (kontrabas, basy)
• Beth Fogleman (gitara, bębenek, t‘fer)
• Robin Bruck (husle, Ocarina)
• Georgi Marinov (nawod rejowanja)

Zastupne lisćiki móža so wot nětka při tiketowej kasy ansambla abo online kupić.