Wot nazymy minjeneho lěta so na Wonkownej lawskej w Budyšinje twari. Napohlad je tučasnje podobny k nowotwarej baletneje žurle w lěće 1952. Twarjenja Serbskeho ludoweho ansambla znaja mnoho stawiznow – runje tak kaž jeho wuměłcy. Hdźež je so něhdy wariło, płokało a blidariło skići so nětko cyle hinajši napohlad. Alena Farkašowa a Rüdiger Žur, spěwarjej chóra Serbskeho ludoweho ansambla, prezentujetaj hižo wot 80-tych lět ptačokwasne programy na jewišću. W tutym lěće staj archiwy překramosćiłoj a mataj tež tu jednu abo tamnu stawiznu k powědanju, kiž staj samaj dožiwiłoj.