Dohlady - Einblicke

Paul Bernewitz, narodźeny w lěće 1997 w Lipsku, pochadźa ze swójby hudźbnikow a nawuknje hižo w starobje pjeć lět klawěr hrać. Hudźbne wukubłanje a mnoho koncertow z chórom Thomanerow běchu tohorunja wažne muzikaliske impulsy. Štyri lět studowaše na wysokošuli za hudźbu w Nürnbergu jazzowy klawěr a pokroči wot lěta 2023 swój studij w předmjetomaj jazz-kompozicija /arrangement (master) na wysokošuli za hudźbu a dźiwadło w Lipsku. Swój prěni album “someday” wozjewi wón w lěće 2022 a žněje za to wysoke připóznaće nowinarstwa a hraješe so wjace króć na sćelakach. Wot něšto časa rozestaji wón so z přewodom němych filmow. Jako baletny repetitor w Serbskim ludowym ansamblu a z tym zwjazanym rozestajenju ze serbskej folkloru je wón sej předewzał, so ze serbskimi němymi filmami a z nimi zwjazanej klawěrnej interpretaciju rozestajić. Z teho je nowy nakład rjada “Dohlady” nastał. Paul Bernewitz budźe najstarši serbski němy film “Cuzy ptak” na křidle přewodźić. Daniel Kubik je medijowy wědomostnik k temam film a Serbja a sobustaw serbsko-němskeje filmoweje syće Łužycafilm. Wón přednošuje na spočatku wječora k stawiznam serbskeho filma a k nastaću filma “Cuzy ptak”.

“Cuzy ptak” z  lěta 1911 je hižo pjaty zhromadny projekt znateje Danki Asta Nielsen z režiserom a pozdźišim mandźelskim dźiwadźelnicy Urban Gad. W filmje jewja so prěnje filmowe wobrazy docyła, kiž pokazuja žiwjenje, kulturu a wšědny dźeń Serbow. Lubosćinska tragedija w třoch aktach je so wokoło stareho hosćenca “Wotschofska” ze serbskimi lajskimi dźiwadźelnikami natočiła . Asta Nielsen jako młoda Jendźelčanka May a jeje nan dojědźetaj sej z ćahom do Błótow. Tam zalubuje so wona do serbskeho burja a čołmikarja Pawoła. Tragiska stawizna je so bjezwuwzaćnje w Błótach wjerćała. May so w njej zesamostatni, emancipuje a so tak k “cuzemu ptakej” Delnjeje Łužicy wuwije. Błóta njejsu z tym jenož kulisa ale tež wažne stejnišćo za socialne róle hłownych figurow. 
(žórło: Lemke, Grit / Räder, Andy (Hrsg.): Sorbische Filmlandschaften – Serbske filmowe krajiny, 2024)